Унгарската влада одлучи вчера да се откаже од непопуларната забрана за работа на малопродажните синџири во недела.
Забраната за работа на продавниците, која ги принудува сите освен најмалите малопродажни места, да не работат во недела, е на сила нешто повеќе од една година, а Унгарците ја сметаат за непопуларна.
„Се покажа дека забраната внесува раздор. Не можеме да ги увериме граѓаните дека ова е успешна мерка гледано од нивна позиција. Според нивното мислење, таа го отежнала нивниот секојдневен живот“, рече Антал Роган, шеф на владиниот кабинет на Орбан.
Две третини од Унгарците кои учествувале во анкетата на компанијата Ипсос минатата година, рекле дека се против забраната за работа во недела. Владата тврдеше дека забраната е полезна за малопродажниот сектор и дека вработеноста во тој сектор лани пораснала.
