Компанијата мајка на британскиот таблоид „Daily Mail“ може да упати понуда за стекнување на новинарскиот и медиумскиот бизнис на „Yahoo“.
„Daily Mail and General Trust“ (DMGT) водела разговори со неколку компании за акциите за инвестирање, со кои ќе ги упатат заедно со понудата. Од „DMGT“ ја потврдија информацијата така што соопштија:
„Со оглед на успехот на „DailyMail.com“ и „Elite Daily“, водиме разговори со голем број на компании кои се потенцијални кандидат-купувачи. Разговорите се во многу рана фаза и не е сигурно дека може да се дојде до договор“.
„DMGT“ е конгломерат со портфолио, кој генерира годишни приходи од околу 2 милијарди фунти (2,8 милијарди долари). Стекнувањето на акциите на „Yahoo“ бил дало импулс на планот за проширување на активностите на „DMGT“ во САД. Кога „DMG Media“ ја купи „Elite Daily“ за 47 милиони долари во минатата година, тогашниот извршен директор за Северна Америка Џон Стајнберг рече дека купувањето е со цел компанијата да се натпреварува со „Yahoo“ и „AOL“.
Покрај „Daily Mail“, „Mail Online“ и „Elite Daily“, во портфолиото на „DMGT“ влегуваат уште „The Mail“ и „Metro“. Според информациите, од „DMGT“ веќе разговарале со околу шест компании за акциите за инвестирање, вклучувајќи ги „General Atlantic“.
Откако со години се соочуваат со потешкотии да го одржуваат својат основен интернет бизнис, „Yahoo“ го одреди 18-ти април како краен рок за поднесување на понудите. Ова може да и даде на компанијата време да парира во обидите на акционерот „Starboard Value“ кој го критикува бавниот процес на продажба на „Yahoo“, и да го смени бордот на директори со свои кандидати.
Близу 40 компании се заинтересирани од средствата на „Yahoo“ и веќе имаат потпишано договори за доверливост. Меѓу другите заинтересирани купувачи е и „Verizon“, која го поседува „AOL“.
