Најголемите банки на „Wall Street“ ќе треба да одвојат повеќе средства за да се покријат евентуални загуби, откако ниските цени на нафтата почнуваат да го вршат своето влијание, сметаат од „Moody’s Investors Service“.
На „Goldman Sachs Group Inc.“, „Morgan Stanley“, „JPMorgan Chase & Co.“, „Bank of America Corp.“ и „Citigroup Inc.“ ќе им требаат дополнителни 9 милијарди долари, за да ги покријат лошите кредити на секторот на нафта и гас во најлошото сценарио на агенцијата за рејтинг, пишува „Bloomberg“.
А сепак – банките ќе можат да апсорбираат слични загуби од добивката за едно тримесечје.
„Да, секторот има препреки. Ова ќе доведе до загуби. Но не толку големи за да отворат дупка во активата на банките“, коментира потпретседателот во „Moody’s“ и автор на извештајот Дејвид Фангер.
Од декември „Moody’s“ го намали кредитниот рејтинг на над 100 енергетски компании, откако фирмите не успеаја да се задржат на површината при цени на нафтата од 40 долари за барел.
Од почетокот на 2015-та година, 110 компании кои обезбедуваат услуги за сервисирање на нафтени полиња, и производители на нафта и гас во Северна Америка банкротираа, а имаат стекнато долгови од вкупно 27 милијарди долари, покажуваат податоците на адвокатската канцеларија „Haynes & Boone LLP“.
