Европските земји мора да ги ублажат мерките за штедење и да донесат нова политика за поттикнување на растот, изјави амриканскиот министер за финансии Џек Лју, на почетокот на серијата состаноци со водечките европски лидери.
Најголемиот трговски партнер САД и најголемиот светски економски блок влегоа во четвртата година од должничката криза, со голем број на земји во рецесија. Американските власти се надеваат, како што пренесува агенцијата АП, дека Европа ќе попушти во фокусирањето за намалување на долгот, со што се загрозува растот поради намалувањето на потрошувачката и зголемувањето на даноците.
Џек Лји, кој во јануари беше именуван за американски министер за финансии, вчера ја започна првата официјална посета со претседателот на Европската комисија, Жозе Мануел Баросо во Брисел. Лју ќе се сретне и со водечкиот европски претставник за економски и монетарни прашања, комесарот Оли Рен и претседателот на Европскиот совет Херман Ван Ромпеј.
„За време на состанок со Баросо, Лју разговараше за потребата за зголемување на побарувачката поради поттикнување на економијата“, изјави еден од претставниците од американското министерство за финансии, додавајќи дека тие, исто така, разговарале и за ситуацијата во Кипар.
Кипар беше принуден минатиот месец да побара десет милијарди евра од европските партнери и меѓународниот монетарен фонд, откако банкарската криза ја доведе земјата до работ од банкротот. Лју, поради оваа причина, ја повика ЕУ да започне со еден од клучни проекти за надминување на должничката криза, а тоа е формирањето на банкарска унија.
Според тој проект, надзорот на банки во еврозоната ќе биде централизиран од почетокот на наредната година, што ќе биде проследено и со формирање на спасувачки фонд, кој ќе има овластување да ги решава банкарските проблеми.
Лју и Баросо, исто така, разговараа и за планираниот договор за слободната трговија помеѓу ЕУ и САД, која, според нив, ќе го поттикне растот на размената преку намалување на царинските тарифи и укинувањето на други трговски бариери.
