Официјална Тирана во случај да бараат бегалците од Сирија, кои се во Грција, да влезат на албанска територија, ќе реагира во согласност со договорот со ЕУ.
Ова е оценката која ја изнесе албанската влада во врска со стационирањето на неколку стотици бегалци кои се во близина на границата со Албанија.
Премиерот Еди Рама изјави дека ако дојде до тој проблем, истиот ќе се решава во договор со ЕУ. Албанија нема да ја отвори границата ниту, пак, истата ќе ја затвори нагласи тој и додаде дека одлуките во тој момент ќе се договараат со ЕУ.
Медиумите во Албанија нагласуваат дека веќе има индиции дел од бегалците кои се во Грција, и кои се до границата со Албанија, да навлегуваат во Албанија за да потоа преминат во Италија. Од друга страна, албанските власти во соработка со италијанските власти имаат план да спречат нелегални минувања на бегaлците во Албанија, а потоа со бродови да влезат во Италија.
