Цените на нафтата на светските берзи во средата беа во пораст по најавите дека членките на Организацијата на земји извознички на нафта(ОПЕК) ќе се сретнат следниот месец во Катар заради разговори околу предлогот за замрзнување на производството.
Катарскиот министер за нафта Мохамед Бин Салех ал сада претходно рече дека членките на ОПЕК и другите производители на нафта ќе се сретнат во Доха на 17 април.
Според неговите зборови, околу 15 членки на ОПЕК и други производители на нафта ја поддржуваат иницијативата.
Американската Администрација за енергетика во среда соопшти дека во САД пораснале резервите на сурова нафта за 1,3 милиони барели, што е под очекуваните 3,4 милиони барели.
Во Лондон цената на барел сурова нафта „Брент“ од Северното море е зголемена за 1,09 долари и сега изнесува 39,93 долари.
Во Њујорк цената на суровата нафта порасна за 1,5 долари и сега изнесува 37,49 долари за барел.