Поради одрони на патиштата во прекин е сообраќајот по регионалните патишта од Битола кон Ресен и од Кочани кон Делчево, соопшти АМСМ.
Имено, на патниот правец А3 обиколница Битола-Ресен на 70+300 км поради свлечиште патот е во прекин во двата правци. Како алтернатива сообраќајот е пренасочен преку град Битола.
На патниот правец Кочани – Делчево поради одрон со голема количина на материјал, сообраќајот е во прекин и се работи на расчистување. Како алтернатива може да се користи патот Виница – Смојмирово – Делчево.
Во петок од 17 часот општинскиот пат село Долни Полог- село Облешево пред Кочанска река е во прекин поради прекопан коловоз и е направен канал за одводнување на надојдена атмосферска вода од врнежи на дожд.
Од четвртокот од 13 часот поради одрони на пат на Виничка раскрсница помеѓу село Истибања и село Калиманци блокиран е сообраќајот во двата правци, а се пренасочува преку Виница.
Според информација од ДЦС МВР од 12.20 часот, во петок, на регионалниот пат Берово – Виница кај местото викано Обозна поради одрон на камења сообраќајот се одвива наизменично по една коловозна лента.
На патниот правец Куманово – Крива Паланка кај село Страцин има свлечиште со кал и земја, со што е зафатена една лента од патот. Се препорачува внимателно возење и следење на поставената сообраќајна сигнализација. Екипите на ЈП Македонија пат интензивно работат на расчистување на свлечиштето и нормализирање на двете ленти за непречено одвивање на сообраќајот.
Сообраќајот на сите останати државни патишта во Македонија се одвива без забрани, по наместа влажни коловози. Магла со видливост од 100 м има на Стража, Крушево и Ѓавато.
АМСМ препорачува внимателно возење, прилагодена брзина на движење и почитување на поставената сообраќајна сигнализација. Посебно внимание е потребно на делниците кои минуваат низ клисурите и засеците, особено на патните правци Катланово – Велес, Маврово – Дебар – Струга, Гостивар – крак Маврово – Стража, Демир Капија – Удово, Виница – Берово, Кочани-Делчево и Ресен – Буково каде е можна почеста појава на одрони.
Потсетување за возачите дека законската обврска за задолжително поседување на зимската опрема во возилата трае до 15 март 2016 година.