Цената на нафтата се задржа во петокот на светските берзи близу границата од 37 долари во очекување на клучните макроекономски податоци од САД заради подобра проценка за побарувачката откако официјалните податоци потврдија раст на резервите во водечката светска економија.
На лондонската берза цената на барелот остана речиси непроменета во однос на претходното затворање и изнесуваше 36,98 долари. Позначителни промени во однос на претходното затворање немаше ниту на американскиот пазар, каде со барелот се тргува по 34,55 долари.
Нафтените пазари и натаму ги кочи растот на резервите во САД во минатата недела, на ново рекордно ниво од 517,98 милиони барели, покажуваат официјалните податоци. Овој податок го неутрализираше оној за падот на американското производство шеста недела по ред, на 9,08 милиони барели дневно.
Оттука инвеститорите во потрага по насоки за потрошувачката вниманието го насочуваат кон податоците за вработувањето во САД во февруари кои ќе бидат објавени во текот на денот. САД е најголем потрошувач на нафта во светот.
„Многу трговци сега ги чекаат податоците од американскиот пазар на труд-тоа е најважниот показател кога се во прашање потрошувачите на сирова нафта“, истакнува Бен ле Брун од сиднејски OptionsXpress. „Инвеститорите имаат нешто повеќе самодоверба со оглед дека цената достигна дно“, напоменува Ле Брун.