Маркиците за изградба на куќи се наоѓаат во населбата „Златен рид“, а општинската администрација целосно ќе биде во функција на заинтересираните апликанти за овој проект.
„Општина Битола во изминатиов период создаваше максимални услови за инвестирање и во функција на тоа ние изработивме три детални урбанистички планови во старата касарна или населбата „Златен рид“, каде се предвидени маркици, односно локации за изградба на куќи. Во касарната инвестиравме во инфраструктурата, а со Министерството за транспорт и врски се договоривме делот од парцелите што ќе бидат од минимум 300 до 400 квадратни метри да се зголеми со можност за прширување и маркиците да ја достигнат бројката 500. Цениме дека оваа бројка е доволна и дека сите амбиции на заинтересираните ќе бидат задоволени, а постапката со помош на Министерството за транспорт и врски ќе биде забрзана“, информираше градоначалникот на општина Битола, Владимир Талески, на презентацијата во понеделник во Битола, во рамките на караванот за промоција на проектите „Купи куќа за млади“ и „Купи куќа, купи стан“.
Министерството за финансии синоќа во исто време, проектот „Купи куќа за млади“ го промовираше и во општините Ресен и Демир Хисар.
