Променете го аголот на гледање – ако цело време размислувате за негативните аспекти на работата, го храните вашето незадоволство…
Секој втор човек на планетата е незадоволен со својата работа, покажуваат истражувањата. Но, постојат неколку работи кои можете да ги направите со цел да си ги олесните часовите поминати на работата која ја мразите.
Променете го аголот на гледање
Ако цело време размислувате за негативните аспекти на работата, го храните вашето незадоволство. Наместо акцентот да го ставите на малата плата и шефот кој се однесува како тиранин, обидете се да пронајдете нешто добро, без оглед дали тоа се колегите со кои е уживање да се работи или фактот дека работата ви е во близина на домот, па помалку време губите во превоз.
Сакам наместо морам
Кога нешто го доживуваме како обврска, го замразуваме тоа, без оглед за што станува збор. Дури и ако некој не принудува нашето омилено хоби да го практикуваме секој ден, во точно одредено време, ние повеќе не би можеле да го сакаме тоа. Наместо секое утро да станувате со мислата дека морате да одите на работа, кажете си на себеси дека сакате, така порачувате дека тоа е ваш избор, а не наредба. Работата навистина е избор, бидејќи благодарение на неа, успевате да се прехраните себе си и семејството, се чувствувате корисно, бидејќи нешто работите.
Живот после обврските
Без оглед колку сте исцрпени, најдете време за работите во кои уживате, без оглед дали е тоа одење во кино, дружење со пријателите, тренинг. Така животот нема да ви се сведе на работата која ја мразите, а и ќе се наполните со позитивна енергија.
