Мултимедијалниот проект „Конекција 2“, на кој беше отворена групна ликовна изложба, беа интерпретирани стихови од македонски поети и исполнети неколку познати македонски песни, беше претставен во среда вечер во Културно-информативниот Центар на Р. Македонија во Софија.
На изложбата беа претставени дела во различни техники. Од областа на сликарството, делата на Перица Георгиев – Пепси, Иво Пецов, Марјан Ѕин, Ице Огненовски – Мерко, Јовица Миленов и Јорданчо Ристовски. Со свои графики се претставија Павел Целковски, Горан Тричковски и Зоран Мише. Слободан Милошески се претстави со две скулптури, Адриана Јованоска со накити и Маријана Иванова со плакати.
Во музичко-поетскиот дел од вечерта, Ѓорги Георгиев и Пламен Великов интерпретираа одбрани стихови од творештвото на македонските поети Ацо Шопов и Михаил Ренџов, а во музичкиот дел беа испеани традиционални македонски песни и неколку познати теми од поп-музиката.
Иницијатор на овој мултимедијален проект е нашиот Центар во Софија, настанот пред софиската публика го претстави и прогласи за отворен директорот Васко Шутаров, а проектот “Конекција 2 ” што годинава ќе биде претставен и во Стара Загора, Бургас и Варна е поддржан од Министерството за култура на Р. Македонија.