Денес во х. Континентал во Скопје се одржа првиот од низата шест промотивни настани, што го означи почетокот на проектот „Интегрирање на етничките малцинства на пазарот на трудот преку поттикнување на нивниот потенцијал за вработување“, финансиран од Европската Унија.
На настанот се бараше место повеќе, а присуствуваа повеќе од 35 учесници, претставници на граѓанските организации, општините, приватниот сектор, како и млади луѓе од целата земја.
Настанот го организираше Фондацијата за Претприемачки сервис за млади, еден од најстарите актери на граѓанската сцена за развој на претприемништвото, во соработка со општината Гази Баба. Следните промотивни настани ќе се одржат во текот на месец февруари 2016: 19.02.2016 (петок) во општина Шуто Оризари и во општина Сарај (двата со почеток во 10:00 часот). Потоа на 26.02.2016 (петок) во општина Аеродром, Скопје (времето ќе биде дополнително одредено), а останатите ќе се реализираат во другите градови во северозападниот дел на земјата (Гостивар/Тетово, Куманово,…).
На денешниот настан беше презентирана планираната богата проектна програма која ќе биде реализирана заклучно со август 2017 година, а сите заинтересирани ќе може да ги најдат релевантните информации на веб порталот: www.pretpriemac.mk. Програмата е отворена за младите луѓе (од 15 до 29-годишна возраст) и жените (студенти и невработени), со посебен фокус на етничките малцинства, од целата земја и ќе вклучи:
– обуки за вработување и самовработување, обуки за започнување бизнис, кариерно советување, менторски сесии, ИТ курсеви, курсеви по англиски јазик, работни пракси во повеќе компании, креативни работилници;
– онлајн курсеви за развој на вештини и лансирањето на одржлива платформа за е-учење;
– јакнење на обучувачите од граѓанските организации за пилотирање на онлајн курсеви и користење на онлајн платформата;
– бизнис план натпревар и финансиска помош од 3000 евра за 5 бизнис идеи.
Активностите ќе започнат следниот месец (март 2016), со отворен повик за пријавување на учесници, што ќе биде објавен на порталот www.pretpriemac.mk.
Проектот „Интегрирање на етничките малцинства на пазарот на трудот преку поттикнување на нивниот потенцијал за вработување“ го имплементираат Фондација за Претприемачки сервис за млади (координатор), ЗИП Институт, Ромската Организација на Жените „Даја“, како и Фондација Футуре 21. Негова главна цел е да го фасилитира процесот на интеграција на младите луѓе и жените од етничките малцинства во земјата преку зголемување на нивната конкурентност на пазарот на трудот и нивните вештини за вработување и самовработување, со цел формирање на нови бизниси и создавање на движечка сила која ќе овозможи континуирано градење на капацитетите и поддршка на професионалниот развој. Проектот е финансиран од Европската Унија во износ од 127,870.40 евра (7.864.030 денари).
