Преговорите на грчката влада со претставниците на меѓународните кредитори за реформите во пензискиот систем во Атина беа тешки и сите прашања останаа отворени.
Тоа го соопшти грчкиот министер за труд, Јоргос Катругалос.
„Преговорите беа детални и тешки. Разговаравме за нацрт-законот“ (за реформите во пензискиот систем), изјави Катругалос по состанокот со претставниците на ЕУ, ЕЦБ, ММФ и Европскиот механизам за стабилност.
Тој изјави дека „сите прашања останале отворени“ и дека претставниците на меѓународните институции не сакале да го дадат своето конечно мислење за нацрт-законот за реформите во пензискиот систем.
„Разговорите ќе продолжат следната недела со техничката екипа на кредиторите“, изјави тој.
Нацрт-законот, поради кој грчките синдикати организираа генерален штрајк, предвидува заштеда на 1,8 милијарди евра годишно, и меѓу останатото, намалување на пензиите.
Меѓународните кредитори се противат на планот да се зголемат придонесите за вработените во Грција и бараат минималната пензија да изнесува 384 евра месечно.
Во интерес на Атина е да ги заврши преговорите колку што е можно побрзо. Ако резултатот биде позитивен, Грција се надева дека ќе започне со преговорите за намалување на јавниот долг, изјави портпаролката на грчката влада, Олга Геровашили.
