„Sony“ најави дека го посветува целиот бизнис со конзолата „PlayStation“ во нова самостојна компанија. „Sony Interactive Entertainment“ ќе ги обедини кон себе „Sony Computer Entertainment“ и „Sony Network Entertainment“.
Новата компанија ќе раководи со глобалниот бизнис на „PlayStation“, а ќе има канцеларии во Токио и Лондон. Централата пак ќе е во Сан Матео, Калифорнија. Нејзината работа треба да почне од 1-ви април годинава. Сите деловни сектори на сегашните компании ќе бидат обединети во новата фирма, вклучувајќи го развојот на хардвер и одржување на онлајн услугата „PlayStation Network“.
Компанијата ќе биде предводена од Андреј Хаус, кој во моментов е шеф на одделот „Network Entertainment“ во „Sony Corporation“. „Sony“ смета дека одвојувањето на „PlayStation“ како самостојна единица ќе помогне за развојот на конзолата и нејзините услуги, што ќе доведе до задржување на корисниците на оваа платформа.
Поточно за корисниците не би требало да има некакви видливи промени во структурата на услугите и нивното брендирање. Надежта на „Sony“ е дека тие ќе се радуваат на подобар квалитет, откако комуникацијата помеѓу одделенијата ќе биде подобрена.
