Група големи европски воздухопловни компании оформи нов сојуз за да може полесно да ги остварува своите интереси кај европските регулатори, како и кај регулаторите на одделни земји во контекст на острата меѓународна конкуренција.
Воздухопловните компании во Европската унија(ЕУ) вработуваат речиси два милиони луѓе, а нивниот придонес кон економијата на ЕУ, според податоците на Европската комисија, изнесува 110 милијарди евра.
Во последно време се соочени со сè посилната конкуренција, посебно од Блискиот исток, од каде Emirates Airline, Qatar Airways и Etihad Airways освојуваат сè поголеми удели во европскиот пазар.
Новата логистичка група Airlines for Europe (A4E) ги здружува компаниите Air France-KLM, easyJet, International Airlines Group, Lufthansa Group и Ryanair, а во следните месеци планира да го зголеми бројот на членки.
„Нискотарифните и мрежните превозници првпат формираат здружение заради поддршка при усвојувањето на нова европска стратегија за воздухопловство“, истакнаа во заедничкото соопштение објавено од страна на челниците на петте компании.
