По речиси десет години планирање, изградба и инвестирани 5,5 милијарди долари, компанијата „Disney“ најавува дека на средината на јуни во Шангај ќе биде отворен најголемиот Disneyland во светот.
Како што јавува CNN Money, во тек се завршните работи на овој тематски парк, а тој ќе биде отворен на 16-ти јуни.
„Shanghai Disney Resort“ ќе се простира на површина од 3,9 милиони квадратни метри.
Ќе содржи два луксузни хотели, неколку трговски центри и шест тематски целини, Мики Авенија, Градина на имагинацијата, Светот на фантазијата, Островот на авантурите, Пештерата со богатства и Паркот на иднината. Освен тоа, стилот на изградба на сите објекти ќе биде прилагоден на кинеската традиција, а ќе содржи елементи и од кинескиот хороскоп.
Како што изјави генералниот директор на „Disney“ Боб Игнер, компанијата со која раководи, верува дека овој парк ќе биде голем успех и покрај економската криза која во последните неколку години владее во најмногубројната држава во светот.
„Чувствуваме голема гордост за овој проект. Како и било каде во светот каде што имаме објекти и кај овој се обидовме да ја прилагодиме цената со животниот стандард на населението“, изјави Игнер.
Се претпоставува дека овој парк годишно ќе го посетуваат меѓу 15 и 20 милиони туристи.
Титулата најголем тематски парк на „Disney“ досега му припаѓаше на „Disney Animal Kingdom“, со површина од околу два милиони квадратни метри.
Тематските паркови и одморалишта во 2015 година и донесоа на компанијата приход од 16 милијарди долари, што, зад телевизијата, е најпрофитабилниот бизнис на „Disney“.