До крајот на јануари Европската комисија ќе претстави нов, амбициозен пакет со кој се ограничуваат можностите за избегнување на оданочувањето. Ова го соопшти комесарот за прашањата на економската и монетарната политика на ЕУ, Пјер Московици.
Правилата ќе бидат во основата на работата на комесарот во наредните денови, објасни тој, цитиран од прес-службата на ЕП.
Во мерките ќе има законски предлози кои ќе ги визираат проблемите во оданочувањето и можностите за негово избегнување во ЕУ, како и во трети земји.
Московици, сепак, призна дека предлозите во оваа област може и да не ја добијат поддршката на Советот на министри.
Општо земено, 2016-та година ќе биде посветена на реформата во корпоративното оданочување и фискалната транспарентност, вети уште комесарот пред европските пратеници.
„Имаме сериозен проблем со можностите за избегнување на даноци и недостаток на транспарентност“, додаде тој.
Московици доби поддршката на ЕП, а претставниците на повеќето политички групи во парламентот, му препорачаа и да покаже повеќе амбициозни цели, отколку постигнатите даночни договори со Организацијата за економска соработка и развој (ОЕЦД) и Г20.