Албанија има во план да даде под закуп дел од своите подземни тунели од времето на комунизмот за одгледување на печурки, соопшти владата во Тирана.
Пет тунели од речиси 1.500 квадратни метри во близината на Тирана ќе бидат понудени на период од 20 години, а тендерот ќе биде распишан на 18-ти јануари, стои во соопштението на Министерството за економски развој.
За време на четириесетгодишното владеење на комунистичкиот диктатор Енвер Хоџа, кој почина во 1985-та година, Албанија беше една од најизолираните земји во светот и опседната од опасноста од напади од страна на Западот.
Во обидот да се обезбеди од нападите, власта изгради илјадници километри тунели и повеќе од 700.000 бункери.
Албанија денеска е членка на НАТО, но и натаму е една од најсиромашните земји во Европа.
Според информациите, неколку од тунелите и бункерите ќе бидат претворени во туристички атракции со кои ќе се обезбеди дополнителен приход за државната каса.
