Јапонскиот државен фонд предложил да инвестира 200 милијарди јени (1,71 милијарди долари) во спасувачки заем за да му помогне на производителот на електроника „Sharp“, објави „CNBC“ според информациите бизнис дневниот „Nikkei“.
Според „Nikkei“, „Sharp“ ќе сака да ги намали и постоечките кредити за 150 милијарди јени од кредитори во приоритетни акции во трампа на долг наспроти капитал.
Веста доаѓа по статијата на „Ројтерс“, според која Фондот „Innovation Network Corporation of Japan“ (INCJ) планира да инвестира во „Sharp“ со намера да го одвои одделот за дисплеи и да го спои со конкурентот „Japan Display“ – компанија во која Фондот е најголем акционер.
Портпаролот на „Sharp“ изјави дека во компанијата се уште разгледуваат различни опции и не презела никакви решенија.
„Sharp“ добил и инвестициска понуда од тајванската „Hon Hai Precision Industry“ позната како „Foxconn“, изјавија извори запознати со овој случај.
Овие извори наведуваат и интерес од приватен акционерски фонд, а „Nikkei“ пред време објави дека американскиот фонд „KKR“ е потенцијален инвеститор.
Иако спасувачката помош од 1,7 милијарди долари во мај, е вториот голем пакет за „Sharp“ за три години, компанијата покажува малку знаци на подобрување.
Таа и другите јапонски производители на електроника за обичните корисници имаат изгубено удел во последната деценија заради „Samsung Electronics“ и другите пргави азиски конкуренти.
Главни кредитори на „Sharp“ се „Mitsubishi UFJ Financial Group“, подружницата на „Bank of Tokyo“ – „Mitsubishi UFJ“, и „Mizuho Financial Group“ на „Mizuho Bank“.
