Почна изградба на нова детска градинка во дворот на основното училиште „Гоце Делчев“ во скопско Горно Лисиче.
Новата детска градинка ќе има капацитет до 100 дечиња и ќе ги исполнува сите неопходни стандарди за ваков тип институции, овозможувајќи современи услови за згрижување и престој на деца од претшколска возраст.
Објектот ќе содржи две големи занимални, простор за прием, кујна, санитарни јазли и административен простор. Детската градинка ќе биде опремена со креветчиња, масички, столчиња, плакари, нагледни средства и играчки.
„Изградбата на нова детска градинка е реална потреба, со оглед на зголемениот број дечиња во нашата општина. Грижата за децата е континуирана“, изјави градоначалникот на Аеродром, Ивица Коневски.
Новиот објект, кој ќе биде енергетски ефикасен со еколошки прифатливи материјали за изградба, ќе се гради во соработка со Министерството за труд и социјална политика, кое учествува со половина од неопходните финансиски средства во висина од 13 милиони денари.
Се очекува новата градинка да биде изградена за шест месеци.