Производствената активност во еврозоната забележа најголем раст во декември во последниве 20 месеци, посочија објавените податоци.
Индексот „PMI“, кој ја надгледува активноста во секторот, се зголемил до 53.2 поени во однос на 52.8 поени, еден месец порано. Резултатот ги надмина просечните очекувања на аналитичарите за вредност од 53.1 поени.
За прв пат од април 2014-та година е регистрирана зголемена активност во сите земји на еврозоната, вклучувајќи и во Грција, покажува извештајот.
Податоците ги зголемија очекувањата дека еврозоната се развива со добро темпо, а во исто време ги намалија во одреден степен шпекулациите за нови агресивни стимулации од страна на ЕЦБ.
Еврото забележа зголемување, така што се тргува на ниво од 1.0930, наспроти нивото од под 1,09 рано утринава.
И покрај добрите резултати, европските индекси се тргуваа силно на негативната територија по загубите на азиските пазари и намалувањето во фјучерсите на државните индекси. Германскиот Dax се тргува со над 3% на негативна територија во својот прв работен ден во новата година.