Мерките кои беа воведена во јуни поради должничката криза во Грција заради заштита од опасноста од нарушување на рамнотежата во билансот на плаќања или на стабилноста на финансискиот систем на Македонија, престануваат во вторник.
Ова го објави Народната банка на Република Македонија(НБРМ) потсетувајќи дека мерките биле воведени за спречување на евентуалните позначителни одливи на капитал од Македонија кон Грција.
„Заштитните мерки ја постигнаа целта заради која беа воведени, односно оневозможија поголеми капитални одливи од Република Македонија, не нарушувајќи го притоа деловното работење на домашните компании со грчки субјекти. Рамнотежата во билансот на плаќања и стабилноста на домашниот банкарски систем беа одржани“, соопшти НБРМ.
Заштитните мерки беа со привремен карактер, за период од најмногу шест месеци, а постоеше можност за продолжување на нивната примена.
Состојбата во Грција веќе одреден период, се стабилизира, кредиторите продолжија со финансиското поддржување на Грција, којашто, пак, се обврза да применува економски и социјални реформи, како и мерки за штедење. Поради тоа, со истекот на шестмесечната важност на заштитните мерки на 28 декември 2015 година, односно почнувајќи од 29 декември 2015 година, оваа одлука веќе не е во примена, стои во соопштението од НБРМ.