Руската нафтена компанија Лукоил соопшти дека ќe го продаде својот преостанат имот во Литванија и Летонија поради, како што наведува, раширеното анти-руско расположение.
Извршниот директор на Лукоил, Вагит Алекперов, изјави дека компанијата не планира проширување на мрежата на бензинските пумпи во Европа, туку дека ќе се фокусира на истражување и производство на нафта.
Лукоил во јуни ја продаде својата естонска филијала Лукоил Ести на естонската компанија Олерекс, а минатата година ги продаде и своите пумпи во Чешка, Словачка, Унгарија и Украина. Од продажбата на имотот, компанијата минатата година собра 1,86 милијарди долари.
Лукоил, според проценката на Форбс, е најголемата приватна компанија во Русија, а во средината на 2000 беше најголем производител на нафта во таа земја, додека сега пред неа е само Роснефт.
Алекперов во месец септември изјави дека Лукоил добро ќе работи дури и ако цената на нафтата падне под 30 долари за барел. Од летото во 2014 година, цените на нафтата загубија повеќе од 60 проценти од вредноста.
