Повлекувањето на американските војници од Авганистан, каде се уште се наоѓаат 68.000 нивни војници, ќе чини помеѓу пет и шест милијарди долари.
„Повлекувањето е природен развој за време на војна, па така повлекувањето од Авганистан е еден од најголемите предизвици во историјата кога станува збор за сложеноста и опсегот на операцијата за воениот транспорт“, изјавил генералот Стивен Шапиро кој е задолжен за оваа операција.
Околу 100.000 контејнери и 25.000 американски воени возила се уште се наоѓаат на авганистанската територија. Дел од транспортните возила и контејнери Американците ќе има ги остават на авганистанските воени сили, а останатите ќе треба да ги повлечат до крајот на 2014-та година кога е крајниот рок за заминување на припадниците на ИСАФ, вооружениот дел на НАТО, од Авганистан.
„Целата операција од почетокот во 2012-та година до крајот ќе се движи меѓу пет и шест милијарди долари“, истакнал Шапиро.
Во јануари 2012-та година висок американски претставник ја процени вредноста на американската опрема во Авганистан на повеќе од 30 милијарди долари. Проблемот за повлекување од таа земја е во нејзината географска положба. Авганистан нема излез на океан, па поради тоа големиот дел од опремата на НАТО била донесена преку пакистанското пристаниште Карачи, а потоа со камиони била пренесена до Авганистан.