Јапонската економија избегна техничка рецесија во третиот квартал, покажуваат ревидираните податоци, според кои БДП-то забележа раст за 1% на годишна основа.
Прелиминарните податоци беа за намалување од 0,8% во периодот јули-септември, што беше втор последователен квартал на контракција и соодветно на техничка рецесија.
Од глобалната финансиска криза па досега третата по големина светска економија беше во рецесија четири пати, потсетува „BBC“.
Во споредба со претходниот квартал јапонската економија порасна за 0,3%. Претходно беше објавено дека БДП-то се намалува за 0,2%.
Аналитичарите истакнуваат дека вредностите се подобри од очекувањата.
„Покрај тоа, во периодот април-јуни намалувањето на економијата е 0,1% на месечна основа, а не 0,2%, како што порано беше соопштено“, вели Марсел Тиелиен од „Capital Economics“. Според Тиелиен една од причините за најдобрите податоци се стабилните инвестиции во бизнисот, кои се зголемуваат за 0,6%, а не се стегаат со 1,3%, како што е соопштено порано.
„Јапонската економија повторно е на патот кон закрепнување. Податоците говорат за подобрување во капиталните трошоци“, вели Хироаки Муто, главен економист во „Tokai Tokyo Research Center“, цитиран од „Bloomberg“. Капиталните трошоци се зголемуваат за 11% на годишна основа во третиот квартал „Враќањето не може да се нарече силно, но не треба да бидеме и премногу песимисти“, дополнува Муто.
Следната недела Управниот одбор на Јапонската централна банка заседава за монетарната политика. Само еден од вкупно 41 анкетирани економисти очекува банката да ја прошири својата програма за стимулации.
Минатиот месец премиерот Шинзо Абе нареди изготвување на дополнителен буџет за оваа фискална година. Според советникот на премиерот Ецуро Хонда буџетот ќе биде 3,5 илјади милијарди јени (28,4 милијарди долари) и ќе обезбеди финансиска помош за сиромашните пензионери.
Одделни податоци покажуваат дека вишокот на тековната сметка на Јапонија се прошири до 1,46 илјади милијарди јени. Очекувањата беа за вишок од 1,59 илјади милијарди јени. Ова е 16-от последователен месец, кога се зема предвид вишок.
