„National Bank of Greece“ (NBG), еден од најголемите кредитори во земјата, ќе биде потпомогната со 2,71 милијарди евра од спасувачкиот фонд за Грција, објави вчера Европската комисија.
Атина во август доби трет спасувачки пакет за последните пет години во износ од 86 милијарди евра. Од нив, 10 милијарди беа резервирани за рекапитализација на „болниот“ грчки банкарски сектор.
Нешто над половина од овие пари ќе бидат потребни за поддршка на четирите најголеми кредитори „Piraeus“, „Alpha Bank“, „Eurobank“ и „National Bank of Greece“.
„Со завршувањето на рекапитализацијата на овие четири банки и со значително учество од страна на приватниот сектор, уште еден елемент на несигурност е отстранет“, изјави еврокомесарот за економија Пјер Московици.
Во јули Грција успеа да договори 10 милијарди евра поддршка за банкарскиот сектор. При последниот договор меѓу Атина и кредиторите стана јасно дека парите ќе се доделат по оценка за секој поединечен случај.
