Повеќе тимови од царински службеници денеска извршија контрола на продажбата на ацизна стока на повеќе зелени пазари, како и во малопродажни и угостителски објекти на територијата на Битола, Кичево и Прилеп, при што со неправилности се откриени во 12 случаи и привремено се задржани вкупно 251 литар алкохолни пијалоци, од кои 243 литри домашна ракија и 8,3 литри други алкохолни пијалоци.
Поконкретно, на зелените пазари во Битола, Кичево и Прилеп се откриени седум случаи на нелегална продажба на алкохол, при што привремено се одземени 219,5 литри домашна ракија и 5,5 литри коњак. Контрола е извршена и во 22 угостителски објекти, а во пет од нив е откриена нелегална продажба на алкохол и притоа се запленети 23,3 литри ракија и 2,8 литри други алкохолни пијалоци – узо, ликер и џин.
Сите привремено задржани алкохолни пијалоци воопшто не биле означени со контролни марки, ниту поседувале било каков сертификат за квалитет, а се нуделе на продажба. Против прекршителите Царинската управа презема соодветни мерки.
Царинската управа во соопштението апелира на внимателност на граѓаните, затоа што консумирањето неиспитани, потенцијално неисправни алкохолни пијалоци неозначени со контролни марки претставува сериозен ризик по здравјето и животот на луѓето.
Во вторникот во соседна Србија, на пример, едно лице почина, а шест беа хоспитализирани во болницата во градот Чачак, поради труење од ракија, правена во домашни услови како мелем за реума во која се ставаат разновидни билки.
Македонската царинската управа порача дека ќе продолжи со ваквите контроли за да ги обезбеди основните принципи за фер конкурентност, правилна наплата на буџетски приходи, но пред сé да се заштити здравјето на луѓето.
Како резултат на сите мерки поврзани со акцизите, што ги презема Царинската управа во континуитет, но и зајакнатите контроли на употребата на акцизните маркички, во периодот јануари – август 2015-та наплатени се приближно 18 отсто повеќе акциза за алкохол, тутун и тутунски производи отколку во истиот период во 2014-та година.
