Производството на ЛНГ во Русија ќе се зголеми на 56,6 милиони тони годишно до 2027-ма година, од 33,3 милиони тони во 2023-та година. Ова го предвидува основното сценарио за развој на секторот подготвено од руското Министерство за економија. Ова е и најоптимистичката прогноза, другите две сценарија предвидуваат стагнација на производството поради западните санкции.
Во „конзервативното сценарио“ евидентирано е дека производството на течен гас ќе биде 38,6 милиони тони годишно, но третото, „стрес сценарио“, не е јавно достапно, пишува „Reuters“. Агенцијата има пристап до владиниот извештај.
Москва веќе ги изјави своите амбициозни цели за секторот за течен гас – до 2030-2035 година, пазарниот удел на руските компании треба да се зголеми од 8% денес на 20%. За ова ќе придонесат наоѓалиштата на Арктикот.
Но, Русија во последните месеци не успеа да започне со извоз на еден од проектите во овој регион – „Арктик ЛНГ2“ на „Новатек“. Причината е што поради санкциите, компанијата не можеше да ги обезбеди потребните танкери со мразокршач. Овој проект е еден од најголемите со капацитет од 19,8 милиони тони годишно. Според извори на „Reuters“, компанијата ќе го запре производството на течен гас.
„Газпром“ го одложува и пуштањето во употреба на големиот гасен комплекс на пристаништето Уст-Луга на Балтичкото Море.
