Францускиот производител „Citroen“ подготвува наследник на својот предводник „C6“. Новиот модел ќе се нуди под брендот „DS“, а ќе биде достапен на сите светски пазари, вклучувајќи ги Европа, Кина и САД.
„Citroen C6“ беше сопрен уште на крајот на 2012-та година, а во моментов луксузните модели на брендот се продаваат под името „DS“. Новиот предводник исто така ќе го добие амблем „DS“, а дизајнот ќе биде инспириран од концептот „Divine“, тврди весникот „Auto-Moto“, според кој името на автомобилот ќе биде „DS8“.
Според информациите „DS8“ ќе има должина од околу 5 метри и ќе биде изграден на новата платформа „EMP2“.
За погонот ќе бидат задолжени ново развиени бензински и дизел мотори со четири цилиндри, а исто така се очекува и хибридна опција. Таа ќе биде од типот „plug-in“, а батериите ќе можат да се полнат од електричната мрежа, а ќе комбинира бензински и електрични мотори кои ќе бидат поставени на задната и предната оска.
Во моментов нема информации за датумот на премиерата на новиот автомобил на „Citroen“. Се очекува, сепак тој да се појави најнапред во Кина, а на пазарите во Европа и САД да биде достапен пред 2020-та година.