Како што се наближува „Goodwood Festival of Speed“ се повеќе производители ги најавуваат своите концепти, но и сериските автомобили кои ќе бидат претставени за време на оваа манифестација. Еден од нив е и „Citroen DS3 Cabrio Racing Concept“.
„Citroen“ сакаше во едно возило да ја обедини технологијата на моделот „DS3 Racing“ и „Cabrio“ верзијата на обичниот „DS3“ која имаше премиера на авто-салонот во Париз 2012-та година.
Во однос на моделот со цврст покрив „Cabrio Racing“ е за 25 килограми потежок што значи дека разликата во перформансите помеѓу тие два автомобили ќе бидат занемарливи.
Концептот привлекува внимание со својата мат-графитна боја на каросеријата чија монотонија ја нарушија контрастните црвени детали и големите 19 инчни алуминиумски тркала.
Сличен стилски пристап е применет и во кабината на автомобилот, на кожните спортски седишта и на инструмент таблата.
Автомобилот го има истиот 1.6 литарски „THP“ турбо-бензински мотор, а на возачот на располагање му се 150 kW / 204 ks.
„Citroen“ најави дека по промоцијата во Велика Британија, „DS3 Cabrio Racing Concept“ ќе може да го видат и посетителите на Саемот во Франкфурт кога ќе се очекува и одговорот на прашањето, дали и кога францускиот производител ќе се одлучи за сериско производство на овој автомобил.
