На свеченоста во Собранието, вчера во чест на празникот беше врачена наградата „Св. Климент Охридски“.
Во областа на воспитанието и образованието наградата ја добија професорот и писател Венко Андоновски и историчарот Наим Алими, додека во областа на културата и уметноста наградата годинава им беше доделена на музичкиот уметник Гарабет Тавитјан, писателот Јордан Плевнеш и на филмологот Илинденка Петрушева.
Од името на добитниците се обрати проф.д-р Венко Андоновски, кој рече дека наградата е незамислива ако не каже дека е посветена на Филолошкиот факултет каде е одржано првото предавање со кое е почнат универзитетот и универзитетскиот живот во Република Македонија на тема „Словенски просветители“.
„Без филм, филмска критика и филмологија, без драма, театар, проза, без музика, без историја нема стварност. Свети Климент е ученик и учител. Сите ние сме учеле од некого, значи сме биле ученици, а сме и учители“, рече Андоновски.
Одлуката ја донесе Организацискиот одбор за државната награда „Св. Климент Охридски“ под претседателство на академик Владо Камбовски.
Инаку,„Св. Климент Охридски“ е највисоко признание за долгогодишни остварувања во областа на воспитанието, образованието, културата, уметноста, здравството, заштитата и унапредувањето на човековата околина и во социјалната дејност од јавен интерес на Република Македонија.
