Од почетокот на политичката криза граѓаните се почесто се одлучуваат да штедат во странска валута наспроти штедењето во денари покажува најновиот извештај на Народна банка на Република Македонија (НБРМ).
Штедењето бележи пад од 0,6 отсто, намалени се штедните влогови и во денари и во евра.
„Вкупните депозити на корпоративниот сектор, во март, бележат месечно зголемување од 0,8%, во целост заради краткорочните депозити во странска валута, при намалување на денарските депозити (пред сѐ депозитните пари). На годишна основа, корпоративните депозити бележат раст од 8,8%, со придонес на денарските и девизните депозити во годишната промена од 59,2% и 40,8% соодветно“, велат од НБРМ.
Додека штедните влогови се намалуваат, кредитирањето бележи раст и кај граѓаните и кај приватниот сектор.
Граѓаните сè повеќе се задолжуваат со потрошувачки и станбени кредити, а во последниот период се бележи раст и на побарувачката на автомобилските кредити.