Шпанија повторно го сруши рекордот за посета на странски туристи во месец август.
Тоа на Шпанија, во која туризмот е еден од главните економски активности, и овозможи да ја заклучи успешно летната сезона.
„Во август девет милиони странски туристи дојдоа во Шпанија, што е раст од 8,8 проценти во однос на август 2013 година, а истовремено и најголемиот месечен прилив на туристи“, соопшти Министерството за туризам.
Најмногу туристи дошле од Британија, а потоа следат Франција и Германија. Тие најчесто ги постувале, Каталонија, Белеарските острови и Андалузија, познати по убавите плажи.
За осум месеци од оваа година, бројот на странски посетители пораснал за 7,3 проценти, на 45,4 милиони, што исто така е апсолутен рекорд.
Шпанија е третата најомилена дестинација во светот, зад Франција и САД.
Околу 10,6 милиони Британци (5,6 проценти повеќе на годишно ниво) ја посетиле Шпанија, 7,6 милиони Французи (10,4 проценти повеќе) и 7,1 милиони Германци (7,5 проценти повеќе).
Од вкупниот број на туристи, 11,7 милиони биле во Каталонија, 8,5 милиони на Белеарските острови, а 7,5 милиони на Канарските острови.
Странските туристи потрошиле повеќе пари отколку претходно. Според податоците на Министерството за туризам тие потрошиле 26,35 милијарди евра во првиот квартал, што е за 7,8 проценти повеќе на годишно ниво.
