Boeing 737 MAX се соочува со потенцијални нови безбедносни проблеми. Поточно, пронајдени се пукнатини во резервоарите за гориво на неколку нови авиони кои се наоѓале во магацин, каде чекале да бидат доставени до авиокомпаниите.
Според BBC, лидерот на програмата 737 на Boeing им кажал на вработените дека ова откритие е „апсолутно неприфатливо“.
Пукнатините се откриени за време на сервисирањето на авионите, а Boeing соопшти дека веднаш направил корекции во производниот систем како би спречил такво нешто повторно да се случи.
Тие измени вклучуваат дополнителни инспекции пред да се затворат резервоарите за гориво, додава AP.
Портпаролот на Boeing изјави дека компанијата не смета дека овој проблем дополнително ќе го одложи враќањето на авионите во воздух.
Авионот 737 MAX беше призејмен во март минатата година по две авионски несреќи, во кои загинаа 346 лица.
