Италијанската влада спаси четири банки од банкрот благодарение на пакетот помош во вредност од 3,6 милијарди евра, кој денеска стапи на сила.
Италијанската влада оваа одлука ја донесе доцна во неделата, откако доби зелено светло од Европската комисија, задолжена за регулирање на помошта во банкарскиот сектор на Европската унија.
Banca delle Marche, Banca Popolare dell’Etruria e del Lazio, Cassa di Risparmio di Ferrara и Cassa di Risparmio della Provincia di Chieti ќе бидат „исчистени“ од 8,5 милијарди евра вредни лоши кредити, а потоа ќе бидат докапитализирани.
Овие лоши кредити ќе бидат префрлени во фондот со кој управува италијанската централна банка Banca d’Italia. Овој фонд, таканаречена „лоша банка“, ќе ја отпише нивната вредност на 1,5 милијарди евра и ќе се обиде да врати дел од парите директно или со продажба на компании кои се занимаваат со наплата на кредити.
Според податоци на италијанската централна банка, оваа операција е проценета на 3,6 милијарди евра и ќе биде покриена со 18-месечни кредити кои ќе бидат обезбедени од трите најголеми и најстабилни италијански банки Intesa Sanpaolo, UniCredit и UBI.
„Државата, а оттука ниту даночните обврзници нема да сноси апсолутно никаков трошок во овој процес“, стои во соопштението.
