Во турската метропола Истанбул во средата вечерта беше отворен саемот на современа уметност Контемпорари Истанбул (Contemporary Istanbul) кој годинава се одржува десетти пат. На манифестацијата учествуваат 28 града од 24 земји со вкупно 102 галерии и повеќе од 700 уметници, бројни колекционери и куратори од светот.
Саемот се одржува на два импозантни простора − Истанбулскиот конгресен центар и Меѓународниот конгресен и изложбен дворец „Лутфу Кирдар“ во централниот дел на градот и ќе трае до 15-ти ноември. Посетителите ќе имаат прилика да ги видат најдобрите примероци на современата уметност од светот и од Турција.
Меѓу турските уметници кои се застапени, се наоѓаат делата на Аднан Чокер, Бедри Бајкам, Бахри Генч и др.
Оваа година најистакнати настани на саемот на современата уметност се манифестацијата Contemporary Teheran, на којашто ќе биде претставена современата иранска уметност и Australia China Art Foundation, на која ќе бидат презентирани оригинални дела од современата уметност на Далечниот исток.
Главен спонзор на манифестацијата, како и досега изминатата деценија, е „Акбанка“ која на својот штанд изложува избор од фотографските дела на светски познатиот уметник Пабло Хеновес. Претседателката на управниот одбор на „Акбанка“, Сузан Сабанџи Динчер истакна дека на саемот на уметноста од основањето до денеска забележуваат сѐ поголем број на странските учесници. Додека минатата година 51 отсто од учесниците биле од странство, годинава нивната застапеноста се искачила на 64 отсто, истакна Динчер.