Во Хрватска во 2011 година 32,7 проценти од граѓаните биле сиромашни, од кои 14,8 проценти екстремно сиромашни, покажуваат податоците од заводот на Европската Унија – Еуростат. Истовремено, во Европа имало 24,2 проценти сиромашни граѓани, а екстремно сиромашни 8,8 проценти.
Додека во Хрватска има 249.029 блокирани сметки на граѓани, со вкупен долг од речиси 18 милијарди куни, 100-те најголеми капиталисти во таа земја во последната година се побогати за 800 милиони куни.
Еден германски весник оценува дека Хрватска е следната земја која може да и создаде главоболки на ЕУ, објаснувајќи го тоа со прераното примање на Бугарија и Романија во 2007 година во ЕУ.
Европската комисија сега го отвори патот за влез на Хрватска во ЕУ. Во извештајот на 15 страни е констатирано дека Хрватска е зрела за влез во ЕУ.
Меѓутоа, германскиот весник констатира дека Хрватска, слично како и Грција, е земја во која има привилегирани одредени клиенти, земја која има поделена управа, пренадуван државен сектор, едвај функционира правосудството и покрај бројните реформи кои беа спроведени, раширена корупција и заостаната економија која речиси не е подготвена за предизвиците на ЕУ.