Официјалните претставници на ЕУ ја прескокнаа големата пречка на патот кон воспоставување комплетна банкарска унија, наменета за стабилизирањето на финансискиот сектор во еврозоната.
Пратениците на Европскиот парламент, Европската комисија и претставниците на земјите-членки (Европскиот совет) постигнаа договор околу законите за формирање на централизирана банкарска супервизија, пренесува агенцијата АП.
Европските лидери минатата година се договорија за основање на заеднички банкарски надзор, под покровителство на Европската централна банка, која е основа за започнување на заедничка шема за осигурување на депозитите и формирање на орган овластен да ги спаси или затвори „болните“ финансиски институции.
„Денешниот договор е чекор кон градењето на банкарската унија, која ни е потребна за да ја вратиме економската доверба во Европа и да го прекинеме лошиот однос помеѓу банките и националните буџети, кој во повеќето случаи е одговорен за рецесијата, сиромаштијата и невработеноста во повеќето земји“, изјави претседателот на Парламентот Мартин Шулц.
Договорот, сепак, е постигнат во необично време, само неколку дена откако еврозоната го принуди Кипар да ги оданочува банкарските депозити со цел да му биде одобрен пакетот помош.