Стапката на невработеност во Бугарија во февруари се зголеми на 12 од 11,9 отсто од претходниот месец, поради се поголемите предизвици кои стојат пред најсиромашната членка на ЕУ во пресрет на изборите во мај, покажуваат денеска објавените официјални податоци во Софија.
Податоците на бугарскиот Завод за статистика ги вклучуваат само регистрираните невработени, а групации на работодавци наведуваат дека реалната невработеност би можела да изнесува околу 17 или 18 отсто.
Официјалната стапка на невработеност минатата година изнесувала 11,1 отсто, во однос на 10,1 отсто од 2011 и 9,5 отсто од 2010 година. Според најновата прогноза на ММФ, невработеноста во Бугарија оваа година ќе достигне 12,5 отсто.
Бугарската економија во 2009 година опадна за пет отсто и оттогаш се обидува да заздрави, но странските инвестиции и натаму се ниски, а просечните плати се на исто ниво.