Јужнокорејската компанија „Samsung Electronics“ ќе биде главен снабдувач на процесори за следниот „iPhone“ на „Apple“, пишува јужнокорејскиот весник „Maeil Business“, повикувајќи се на анонимни извори од индустријата.
Според нив, „Samsung“ ќе биде одговорен за околу 75% од чиповите произведени за следниот смартфон на „Apple“, пишува „Ројтерс“.
Весникот не кажува со колкава вредност е договорот и која друга компанија ќе биде снабдувач на гигантот од Купертино.
„Samsung“ ќе ги произведува чиповите во својата фабрика во Остин, Тексас. Портпаролот на јужнокорејската компанија изјави дека фирмата нема да ги коментира ваквите шпекулации. „Apple“ не одговори веднаш на барањето за коментар.
Минатата недела стана јасно дека „Samsung Electronics“ планира да ги користи свои микропроцесори во наредните верзии на смартфоните од серијата „Galaxy S“, а не чиповите на „Qualcomm“.
Како причина за тоа, компанијата посочи дека уредите на „Qualcomm“ прегреаваат за време на тестовите. Ова сугерира дека „Samsung“ сака да стане самостојна компанија и да го прошири делот за слични уреди. Затоа ќе инвестира 15 милијарди долари во нова фабрика, која ќе се наоѓа надвор од Сеул.
