Втората по големина германска банка КомерцБанк се согласи да плати над една милијарда долари за прекин на истрагата на американските власти, кои ја обвинуваат за кршење на ембаргото наметнато од САД.
Договорот, што вклучува истраги на американската Управа на федерални резерви, регулаторот на финансиски служби во Њујорк, Министерството за правда и Обвинителството на Менхетен, е во процес на финализирање и ќе биде официјално објавен во јануари, соопшти анонимен претставник.
Германската банка е казнета со 600 милиони долари за трансакции, кои се однесуваат на кршење на одлуката на САД за ембарго на земји како Иран, Судан и Мјанмар. Останатиот дел од сумата е поврзана со други обвиненија кон банката, како кршење на американските правила против перење на пари.
Обвиненијата се покренати кон крајот на септември од Обвинителство на Менхетен во Њујорк.
