Грчкиот БДП падна за 20%

Гувернерот на Банката на Грција и член на Управниот одбор на Европската централна банка Јоргос Провопулос, денес изјави дека рецесијата го намалила грчкиот бруто домашен производ (БДП) за 20,1 проценти во периодот од 2008 до 2012 година, истакнувајќи дека економијата полека закрепнува, откако земјата избегна банкрот и исклучување од еврозоната. Провопулос истакна дека грчката економија ќе остане во рецесија и во 2013 година, со очекуван раст на невработеноста, пренесува агенцијата АП.

Гувернерот, за време на презентирањето на годишниот извештај на централната банка, ги повика политичарите да не ја користат долготрајната рецесија како изговор за избегнување на примената на мерките за штедење, кои Атина ги договори со меѓународните кредитори во замена за финансиска помош.

Закрепнувањето на грчката економија зависи од континуираните реформи, напомена Провопулос, предупредувајќи дека опасностите кои и се закануваат на Грција се уште не се исчезнати.