Американски „JPMorgan“ во првото полугодие беше најуспешен меѓу инвестициските банки со приходи од 11.5 милијарди долари, а самиот врв на табелите го држи и во сегментот работење со финансиски инструменти со фиксни приноси и услуги за советување кај трансакциите, покажаа најновите податоци.
Второто место го поделија банките „Goldman Sachs“ и „Deutsche Bank“, покажаа објавените податоци од страна на компанијата за анализа во сегментот – инвестициско банкарство, „Coalition“. Следат „Bank of America/Merrill Lynch“ и „Citi“, потоа „Morgan Stanley“ на шестото место на оваа ранг листа, „Credit Suisse“ на седмото и „Barclays“ на осмото место. Деветото и десетото место го заземаа „UBS“ и „BNP Paribas“.
Ваквиот резултат наведува на заклучок дека „JPMorgan“ е на пат да ја задржи водечката позиција на таблета за цела година. На прво место се наоѓа од 2010-та, кога компанијата „Coalition“ започна да ја објавува својата ранг-листа.
На „JPMorgan“ на првото место му се придружија „Deutsche Bank“ и „Citi“ во сегментот на работење со инструментите со фиксни приноси, валути и стоки. Во првите шест месеци од оваа година, трите банки оствариле по отприлика 5.9 милијарди долари од ова работење.
Во сегментот тргување со акции, првото место веќе втора година пореди го држи „Morgan Stanley“, со приходи од 2.8 милијарди долари во првото полугодие. Второто место го заземаа „JPMorgan“ и „Goldman Sachs“, кои на минатогодишното рангирање, заедно со „Morgan Stanley“ го делеа првото место.
„Goldman Sachs“ напредуваше за едно место, заземајќи ја водечката позиција во сегментот советување за трансакциите, пред „JPMorgan“ и „Bank of America“. Во првите шест месеци тие оствариле приходи во овој сегмент од по три милијарди долари.
