Занаетчиите од Куманово нема да плаќаат комунална такса за фирма, односно назив за деловна просторија.
Советниците на 79-та седница на Советот на општината ја донесоа предлог-одлуката за ослободување од комунална такса, а претходно ги утврдија дефицитарните занимања и занаети во изумирање на подрачјето на општината. Според раководителот на секторот за локален економски развој, Зоран Павловски, одлуката во која е прецизирано кои занаети се ослободуваат од одредени плаќања претставува стимулативна мерка за заживување на занаетите во општината.
„Се работи за стари занаети во изумирање, а тоа се ковачите, грнчарите, лимарите, казанџиите, копчарите, свеќарите, крзнарите, шапкарите, изработувачите на сувенири, односно ракотворби, јорганџии, опинчари, саатчии“, објаснува Павловски.
Оваа одлука е предвидена во Закон за комунални такси. Досега занаетчиите за оваа комунална такса одвојуваа по две илјади денари.
