Американскиот производител на електрични автомобили „Tesla Мotors“ во Невада ќе ја изгради најголемата фабрика за производство на литиум-јонски акумулатори на светот во вредност од пет милијарди долари, изјави денеска гувернерот на оваа сојузна држава, Брајан Сандовал.
Споменатата фабрика, според неговите зборови, ќе и донесе на економијата на Невада скоро 100 милијарди долари во наредните 20 години, ќе вработи директно 6.500 работници и индиректно уште 16.000 работници, а со тоа ќе го зголеми бруто домашниот производ на Невада за четири отсто.
„Договорот со „Tesla Мotors“ ќе ја промени Невада засекогаш, помагајќи отворање на илјадници нови работни места и ќе донесе милијарди долари во нашата економија“, вели гувернерот на церемонијата со директорот на „Teslа“, Елон Маск.
Тој додава дека ова е историски ден за Невада, како и дека по изградбата на фабриката, тоа ќе биде најголемата и најнапредната фабрика за акумулатори во светот.
Невада се натпреваруваше со уште четири држави – Калифорнија, Тексас, Ново Мексико и Аризона, да биде домаќин на фабриката на „Teslа“, а по постигнувањето на договорот со „Teslа“ ветија пакет на даночни олеснувања, вреден 1.25 милијарди долари во наредните 20 години.