Холанѓанецот Дик Адвокат ќе го преземе националниот тим на Србија, целта ќе биде да ја изведе земјата до пласман на Европското првенство во 2016-та година, потврди претседателот на фудбалската федерација на Србија (ФСС), Томислав Караџиќ за Ројтерс.
„Договорот што го постигнавме со Адвокат е резултат од разговори, кои траеја повеќе од еден месец и ние официјално ќе го доведеме како нов тренер на националниот тим“, објави денес Караџиќ.
66-годишниот Холанѓанец водел серија на клубови во својата кариера, а за последно беше на чело на АЗ Алкмар. На ниво на национални тимови бил на чело на Холандија, Белгија, Република Кореја и Русија.
Сега ја презема функцијата од Љубинко Друловиќ кој беше привремен тренер и очекувањата беа да биде назначен со постојан договор.
Србите се пласираа за Светското првенство во 2010-та година под раководство на Радомир Антиќ, но ги пропуштија Евро 2012 и СП 2014.
Адвокат ќе биде втор странски тренер во историјата на српскиот национален тим по Хавиер Клементе, кој не успеа да ги одведе за Евро 2008, кога беше ангажиран.