Њујорк – Цените на нафтата се намалија синоќа, но засега не се очекува нивни поголем пад, бидејќи инвеститорите и натаму се загрижени околу евентуалниот прекин на испораките поради заострување на судирот во Ирак. Американската „лесна“ нафта за испорака во јули поевтини на Берзата во Њујорк за 35 центи на 106,55 долари за барел, додека северноморска „брент“ нафта за августовска испорака во Лондон чинеше 112,56 долари, односно 38 центи помалку од крајот на завчерашното тргување. – Цените на нафтата и натаму можат да растат поради ризик од евентуален прекин на доставата поради заострувањето на состојбата во Ирак, смета аналитичарот на компанијата „ЦМЦ Маркетс“ од Сингапур, Дезмонд Чуа.
Белград – Вкупната загуба на 510 јавни претпријатија во Србија во 2013 година изнесувала 51 милијарда динари (над 440 милиони евра), што е за 6,7 отсто помалку од претходната година. Меѓутоа, тоа е 2,2 пати повеќе од вкупните загуби на целото стопанство, соопшти српската Агенција за стопански регистри (АПР). Јавните претпријатија во Србија вработуваат 98.182 работници, што е 1,248 повеќе од лани и е 10 отсто од вкупниот број на работници во стопанството.
Подгорица – Црногорската авионска компанија „Монтенегро ерлајнс“, која работи со загуби најде нов начин за заработка – користење на своите авиони како летечки рекламни платформи. Така сите шест оперативни авиони во флотата, вклучувајќи го и најновиот „Ембраер Е-190“, кој пристигна од бразилската фабрика пред неколку недели, на двете страни на предниот дел од трупот под името на компанијата, доби и голема реклама за комплексот „Дукљански градини“ во Будва. „Монтенегро ерлајнс“ лани оствари за 1,58 милиони евра подобар финансиски резултат во однос на 2012 година, кога имаше загуба од околу 5,4 милиони евра.
Подгорица – Црна Гора, според нејзните претставници, во случај на напуштање на еврото би се соочила со одредени ризици. Тие ризици би биле: зголемени инфлаторни очекувања, влошување на фискалниот дисбаланс, раст на сивата економија, намалување на странските директни инвестиции и на крај економска рецесија. Во извештајот на Европската комисија од скринингот за поглавјето „Економска и монетарна унија“, се наведува дека Црна Гора потенцирала оти би сакала да продолжи да го користи еврото како официјално средство за плаќање и ги истакнала бројните ризици во случај на напуштање на еврото.
Тулуз – бМинистрите за економија на Франција и Германија, Арно Монтебур и Зигмар Габриел ги повикаа САД да не ја субвенцираат компанијата „Боинг“. – Двете влади ги повикуваат САД да се вклучат во лојална и фер конкуренција, а не во конкуренција која се базира на милијарди долари субвенции, рече Габриел откако со Монтебур во Тулуз го посети европскиот производител на авиони „Ербас“. Германскиот министер изјави дека од Европската комисија се очекува со актуелните трговски преговори да го сврти вниманието на САД на фактот дека ги кршат правилата на Светската трговска организација со давањето субвенции на индустријата.
Амстердам – Службеник на „Гринпис“ со своето лошо тргување на пазарот на девизи на оваа меѓународна еколошка организација и нанел загуба од 3,8 милиони евра. Организацијата, со седиште во Амстердам, соопшти дека нејзиниот службеник ги надминал своите овластувања со големи инвестиции врз основа на верувањето дека еврото нема да јакне во однос на другите валути во 2013 година, а се случи спротивното. „Гринпис“ затоа го отпушти овој работник, но прецизираше дека нема докази дека тој е виновен за измама.
Лондон – Инфлацијата во Велика Британија во мај успори на 1,5 отсто, што е најниско ниво во последните 4,5 години, покажаа официјалните податоци на статистиката во Лондон. Невообичаено ниската инфлација сепак е во сенка на таа во 18-члената еврозона, каде Велка Британија не е членка. ЕЦБ поради успорување на инфлацијата во монетарната унија, покрена низа мерки во обид парите да ги впумпа во економијата и да ги поддржи цените поради заканите од дефлација.
Вашингтон – Кина, Турција и Чешка се придружија на земјите најголеми светски извозници на лесно оружје, кои ги предводи САД, покажуваат најновите податоци на ОН. Според тие податоци, Италија е и на врвот на листата на увозници на лесно оружје на чие чело, исто така, се САД. Вредноста на глобалната трговија со рачно и лесно оружје речиси двојно се зголеми од 2001 до 2011 година, од 2,38 милијарди на 4,63 милијарди долари.
Сиетл – Вработените во „Старбакс“ кои не сакаат цел живот да останат шанкери ќе добијат можност да стекнат факултетска диплома со помош на овој синџир кафетерии. За сите 135.000 вработени во САД, кои работат најмалку 20 часа неделно, „Старбакс“ нуди двогодишна онлајн програма за студии на Државниот универзитет во Аризона. Во „Старбакс“ велат дека вработените кои ќе ја прифатат оваа понуда ќе можат да студираат што сакаат и да ја напуштат компанијата кога сакаат.
Сан Франциско – Компанијата „Твитер“, која се бори за привлекувањето на нови корисници и со финансиски загуби, остана и без двајца луѓе на раководните позиции. Кон крајот на минатата недела од „Твитер“ си заминаа двајца менаџери од самиот врв на компанијата Ал Роуган и Клое Слејд. Зад оваа куса објава од компанијата веројатно се крие многу подлабок судир и негативна атмосфера која владее во „Твитер“ кој се бори за опстанок на пазарот. Освен драматично успорениот раст на бројот на корисници, финансиските резултати никако не му одат во прилог на „Твитер“, па тоа е главна причина за разидување на ставовите на водечките луѓе на компанијата.
