Белград – Српскиот национален авиопревозник „Ер Србија“ објави дека „ЈАТ Ервејз“ лани остварил загуба од 73 милиони евра. Авиокомпанијата „Ер Србија“, која како наследник на „ЈАТ Ервејз“, почна да работи кон крајот на октомври минатата година, соопшти дека финансиските извештаи првпат се составени врз основа на меѓународните стандарди за финансиско известување и поднесени на ревизија во ревизорската куќа КПМГ.
Белград – Основна причина за поплавите е несоодветно одржување на каналската мрежа, а за регулирање на истекување на водата потребни се средства кои се мерат со милијарди евра, изјави претседателот на Здружението на аграрни економисти на Србија, Младин Шевартиќ. Со оглед на висината на тој износ, во овие економски услови, додава тој, без меѓународни кредити не е можно да се изврши ни прочистување на каналите, а не пак да се изгради нова мрежа.
Подгорица – Црногорската „Атлас банка“ изрази длабока зачуденост поради одлуката на Централната банка на Русија да ја повлече нејзината лиценца за работа. „Атлас банка“ потсетува дека Централната банка на Русија на 16 април оваа година, според својата одлука, и дала рок од шест месеци на нејзината филијала во Москва, да изврши измени на интерните акти и да ја прилагоди дејноста кон одредбите на законот.
Загреб – Европската комисија сега предвидува пад на хрватскиот БДП оваа година од 0,6 отсто, иако кон крајот на февруари прогнозираше благ раст од 0,5 проценти. Скромно зајакнување на хрватската економија сега се предвидува дури за идната година, кога се очекува раст на БДП од 0,7 отсто. – Се очекува продолжување на контракцијата на хрватското стопанство во 2014 година, но таа постепено ќе се намалува пред да биде покренат скромен раст во 2015-та, наведе Комисијата во својот документ.
Загреб – Доставата на производи за стоковната куќа „Икеа“ во Загреб почна оваа недела, а целиот асортиман од околу 9.500 артикли ќе биде достапен до крајот на претстојното лето, кога стоковната куќа ќе ги отвори своите врати за купувачите во Хрватска. – Познавањето на начинот на кој луѓето живеат е предуслов за создавање на „Икеа“ асортиманот кој одговара на потребите на луѓето. Голем број луѓе ширум светот, па така и во Хрватска, при планирањето на уредувањето на домот, се ограничени со куќниот буџет, но и со се помалиот животен простор, се наведува во соопштението на шведската компанија.
Макао – Кинескиот град Макао, најголема азиска дестинација за коцкање, само во април од игри на среќа заработил 3,92 милијарди долари. Приходите на Макао во април се зголемени за 10,6 отсто на 3,92 милијарди долари, од 3,54 долари во истиот период лани. За помалку од два месеца, Макао обично од коцкање заработува повеќе отколку што заработува американскиот Лас Вегас за цела година, додека годишните приходи на Макао лани достигнале рекордни 45 милијарди долари.
Њујорк – Истекот на многу патенти влијаеше на падот на профитот на американскиот фармацевстки гигант „Фајзер“, кој го повтори интересот за купување на британскиот ривал „Астра Зенека“. Заработката на американската компанија падна за 15,3 отсто во првиот овогодишен квартал на 2,3 милијарди долари, сметајќи дека истекот на неколку патенти за многу бараните лекови го загрозил профитот. „Фајзер“ наведе дека се надева оти неговата зголемена понуда за „Астра Зенека“ ќе ја мотивира компанија да се согласи на разговори за евентуално нивно спојување.
