Белград – Србија и ОАЕ имаат многу простор за проширување на заедничките стопански активности и промоција на трети пазари, заклучија претседателот на Стопанската комора на Србија (ПКС), Жељко Сертиќ и водечките бизнимени во коморите на емиратите Шарџа и Дубаи.
Белград – Работодавците и синдикатите во текот на следниот месец, кога истекува рокот за усвојување на новиот закон за труд, нема да можат да се договорат за содржината на тој документ, па веројатно ќе треба повторна интервенција на премиерот Александар Вучиќ, оцени директорот на Унијата на работодавци на Србија (УПС), Драгољуб Рајиќ. Рајиќ вели дека таа работа најверојатно ќе мора да ја заврши Владата, бидејќи по најавите дека сите системски закони мора да се усвојат до 15 јуни, тој не гледа дека има време за договор меѓу трите страни.
Загреб – Работниците во трговијата на мало во Хрватска, годишно одработуваат најмалку 16,3 милиони работни часови кои работодавците не им ги плаќаат. Според податоците на Синдикатот на трговијата на Хрватска, секој трговец годишно на работодавецот му подарува една месечна плата, на име неплатени прекувремени часови. На пример, продавниците за храна вратата на купувачите ја отвораат во седум часот наутро. Тоа не значи дека работниците кои работат во нив доаѓаат некоја минута пред да отворат. Тие доаѓаат и по еден час порано.
Љубљана – Бонитетната агенција „Фич“ соопшти дека ја зголемила прогнозата за Словенија од негативна на стабилна. Агенцијата во извештајот објавен на својата интернет страница предупреди дека актуелната политичка криза и веројатните предвремени избори можат да го загрозат спроведувањето на планираните реформи во државата. – Политичката нестабилност го загрозува спроведувањето на програмата за структурни реформи за 2014 и 2015 година, вклучувајќи ја приватизацијата на клучни фирми во државна сопственост, се потенцира во извештајот.
Брисел – Претставниците на Русија, ЕУ и Украина се договорија испораките на гас за сега да не прекинуваат, соопшти европскиот секретар за енергетика Гинтер Етингер. – Испораките на гас преку Украина се гарантирани до крајот на овој месец, изјави Етингер по разговорот со рускиот министер за енергетика Александар Новак и неговиот украински колега Јуриј Продан во Варшава.
Берлин – Падот на извозната побарувачка минатиот месец го погоди германскиот сектор за машински инжинеринг, кој е важен дел на германската индустрија и извозот. Во март вкупните порачки опаднаа за шест отсто во однос на истиот месец лани, додека извозните порачки се намалени за 13 проценти, а домашните се зголемиле за 13 отсто. На квартална основа, странските нарачки опаднале за четири отсто во првите три месеци од оваа година, додека домашните порачки пораснале за три проценти.
Пекинг – Концептот и дизајнот на новиот евтин автомобил на „Фолксваген“ за кинескиот пазар, веќе се подготвени, а сите делови ќе се произведуваат во Кина. „Фолксваген“, веќе една година се обидува доволно да ја намали цената на производството на автомобили, за да може тие да се продаваат по очекуваната цена од 6.000 до 8.000 евра.
Вашингтон – Суд во Пенсилванија донесе пресуда која подразбира дека мора да се продаде куќа од 280.000 долари поради неплатени сметки од 6 долари и 30 центи. Иако изрази жалење што морал да донесе таква пресуда, судијата потенцира дека нема намера да ја менува својата одлука. Еилен Батисти, сопственичка на куќата, се обидела да ја поништи одлуката тврдејќи дека не била навреме известена, ниту за долгот, ниту за продажбата на куќата.
Сиетл – На Денот на трудот работниците во американскиот град Сиетл добија добри вести. Имено, градоначалникот на Сиетл најавил план со кој би се зголемила минималната плата на 15 долари по час. Ако планот се оствари, тоа ќе биде ефективно највисоката минимална плата по работен час на светот, освен во Швајцарија, која кон крајот на овој месец треба да гласа на референдум за минимална цена на трудот од 25 долари за час.
Коментари