Брисел – Бугарија и Европската комисија немаат ист став за иднината на проектот на „Газпром“, „Јужен поток“. Бугарскиот министер за енергетика Драгомир Стојнев по состанокот со европскиот комесар за енергетика Гинтер Ојтингер, рече дека реализацијата на „Јужен поток“ нема да биде запрена, отфрлувајќи ги повиците од Европскиот парламент за замрзнување на проектот.
Белград – Просечната нето плата во Србија исплатена во март изнесувала 43.452 динари (375 евра) и номинално е за 1,4 отсто помала од февруари, а реално за 1,1 отсто. Српскиот Републички завод за статистика соопшти дека во споредба со март 2013 година, просечната плата била поголема за 4,2 отсто, а реално за 1,9 отсто.
Белград – Растечкиот буџетски дефицит на Србија предизвика цела низа проблеми и новата Влада со итна краткорочна фискална консолидација мора да создаде услови за реформа на јавниот сектор, изјави претседателот на Сојузот на економистите на Србија, Александар Влаховиќ, истакнувајќи дека извозот е единствена светла точка на српското стопанство.
Белград – Фабриката „Симпо“ од Врање на Рашко-призренската Епархија и ги подари својот погон за производство на ламелиран мебел и пиланата во Зубин Поток. Тоа е направено со идеја на тој начин да се обнови неговото производство и продажните капацитети. Договорот за подарокот го потпишаа во Белград претседателот на „Симпо“, Драгомир Томиќ и епископот рашко-призренски Теодосије, во присуство на министерот задолжен за Косово и Метохија, Александар Вулин.
Подгорица – Црногорците на Кинезите како туристичка атракција можат да им го понудат синото небо над Црна Гора, смета црногорскиот амбасадор во Пекинг Бранко Перовиќ. – Поради големиот смог кој е присутен во текот на целата година, посебно во Пекинг, не знаат како изгледа небото. Затоа во туристичката понуда на Кинезите можеме да го вклучиме синото небо, исто како во песната „никаде небото не е сино како над Црна Гора“, вели Перовиќ. Зборувајќи за привлекување на кинески туристи, Перовиќ рече дека нив можеме да ги добиеме само како регион.
Подгорица – Матичните броеви на клиентите на црногорската „Комерцијална банка“ станаа броеви на нивните жиро сметки, пренесуваат подгоричките медиуми. Црногорската агенција за заштита на лични податоци предупреди дека најголемата банка во државата, со тоа го прекршува Законот за заштита на личните податоци. Со тоа што броевите на жиро сметките на физичките лица во банкате се нивните матични броеви на клиентите, според Агенцијата, тие се ставени на увид на јавноста, а со самото тоа и подложни на злоупотреба.
Загреб – Туристичката понуда на Хрватска за руските туристи е поскапа и од Грција, Шпанија и Италија, како конкурентски држави. Туристичките работници се загрижени бидејќи за туристите од Русија, Хрватска е поскапа од Шпанија за 12 отсто, од Грција за 18 отсто, а поевтина е дури и Италија за околу 5 отсто, пишува „Вечерњи лист“. Бидејќи минатата година Хрватска поради визите изгуби околу 50.000 руски туристи, во оваа година проблемот може да биде зголемен, а податоците покажуваат дека побарувачката на рускиот пазар за летување во Хрватска е помала за 30 отсто од лани и се проценува дека нивниот број оваа година може да биде помал за околу 10.000.
Љубљана – Словенечката премиерка Аленка Братушек соопшти дека Владата одлучила да ги продаде акциите на државата во „Телекомот“, за да овозможи негово преземање од најдобриот стратешки инвеститор по подобра цена, најавувајќи дека најголемата словенечка банка НЛБ, никогаш во целост нема да биде продадена, поради нејзината стратешка важност за државата. – Се одлучивме на продажба на целиот „Телеком Словенија“ за да добиеме што подобар стратешки партнер и што подобра цена, рече Братушек за неделникот „Младина“.
Њујорк – Бонитетната агенција „Фич“ ја зголеми прогнозата на кредитниот рејтинг на Италија, од негативна на стабилна, задржувајќи ја досегашната оценка БББ плус. Агенцијата го поздрави крајот на рецесијата во Италија, како и волјата на новиот премиер Марио Ренци за спроведување на неопходните реформи. „Фич“ смета дека условите за финансирање на Италија се подобрени, како и дека буџетските ризици во поглед на финансискиот сектор се намалени, бидејќи големите италијански банки го искористија подобрувањето на пазарните услови за да ги зајакнат сопствените фондови.
Париз – Бонитетната агенција „Стандард и Пурс“ го потврди кредитниот рејтинг на Франција на ниво АА, како и стабилната прогноза за следните две години. Во извештајот на агенцијата се наведува дека јавниот долг на Франција во однос на БДП ќе остане висок и дека ќе расте до 2017 година. „Стандард и Пурс“ очекува дека француската Влада постепено ќе го намалува буџетскиот дефицит, како и дека и натаму ќе води политика чија цел е намалување на трошоците на работата и данокот.
Москва – Руската валута рубљата се стабилизираше, откако централната банка неочекувано ја зголеми референтната каматна стапка. Вредноста на рубљата во однос на доларот сега е 35,88 рубљи за долар, во споредба со нивото од 35,95 рубљи за долар, кој важеше пред одлуката на банката да ја зголеми референтната каматна стапка за 50 процентни поени на 7,5 отсто.
Каиро – Египет ќе се обиде да заштеди половина од парите кои ги троши на субвенции за купување на пченица, така што ќе воведе нов систем на паметно плаќање. Со тоа ќе обезбеди најевтиниот леб да оди кај луѓе на кои им е најпотребен. Оваа африканска земја е најголем светски увозник на пченица, чија цена ја формира меѓународниот пазар. Нередите во Украина влијаеа на зголемување на цените на оваа суровина последните неколку месеци.
Коментари